باسم يوسف ينتقد برامج تستخدم ألفاظًا خارجة دون تشويش

انتقد الإعلامي الساخر باسم يوسف السماح للبرامج المصرية باستخدام بعض الألفاظ الخارجة، دون أن يتم وضع تشويش بالصوت عليها، مؤكدًا أن تلك الكلمات كان غير مسموح بها في برنامجه، مستنكرًا ما يقال في بعض البرامج من ألفاظ تستدعي التشويش عليها.

وكتب باسم يوسف تدوينة على فيس بوك قائلا: ""أيام ما كان مدعي الفضيلة والأخلاق بيتهموا البرنامج إنه بيقول ألفاظ ونكت أبيحة، كانت أكتر حاجة بنقولها هي كلمة "فشخ" وحتى دي كنا بنحط عليها "تيت" ٩٩٪ من التيت اللي كنا بنقوله ده كانت كلمة فشخ اللي كان "بتأذي" المشاعر المرهفة للمشاهدين".

وأضاف: "تمر الأيام وأتفرج على البرامج اللي موجودة دلوقتي وألاقي فشخ بتتقال عادي من غير "تيت" زائد إيحاءات أكتر من اللي كنا بنقولها، كل ده مفهوم لأن البرنامج ما كانتش المشكلة بتاعته هو إيحاءات ولا ألفاظ دي كانت مجرد حجة، بس من يومين شفت إسكتش لساترداي نايت لايف بالعربي ولقيتهم بيرموا إفيه على أحمد موسى وبيحطوا "تيت" على اسمه. فعلا؟ السقف وطي للدرجة دي؟".

وتابع باسم يوسف: "أنا مش بالوم اللي بيشتغلوا في البرنامج ده أو غيره زي أبلة فاهيتا أو بقية البرامج الكوميدية، بالعكس البرامج دي فعلا فيها أكتر ناس موهوبة في مصر وحزين إني ماكانش عندي الفرصة إني أشتغل معاهم، لكن لما يوصل الموضوع إن الدولة ما تستحملش كلمة مش على الرئيس أو السلطة أو الوزراء، لا على واحد من الإعلاميين اللي رمتهم الدولة علينا".