أفكار وبتفرفر والحروف متكسّحه  الدنيا خرسا الشعر ليه مابيخترفشِ دلوقتي؟؟!! مع إن المعاني... كل المعاني جوا مني صايبها حمّى -2- قصايد فاضيه. بنات الشمس لابسين هدوم سودا والمواويل دي بتولول وصوت واحد تخين جدا  معلق نفسه في السما وبيقول  "وعشان يعيش واحد لازم يعيش مجموع وعشان يعيش مجموع لازم يموت واحد" -3- وِرْد البُكا اليومي  والذكريات الهَمّ طبطبة الحنين حواديت بتنشع دم بنات الشمس بترفرف على المجروح وصوت البوح بيعلن ف البعاد "تفاصيل البدايه ساعات تشبه قوي النهايات" -4- بنات الشمس بتعاند بتنور صدا الكوابيس وصوت في الحلم مش مسموع  بيهتف بالرجوع للجوع يقول فجأة فيقلقهم "فقير اللي يعيش لحظة ويسيب بكره  ومجنون اللي يسيب لحظة عشان بكره"