حلّت الفنانة منى زكي ضيفة على الإعلامية عبلة أسامة؛ في برنامجها "عندك وقت مع عبلة"، المذاع عبر شاشة قناة MBC، حيث كشفت سبب اتخاذها قرار الابتعاد عن الوسط الفني خلال السنوات الماضية، بجانب حديثها عن دخولها مجال الإنتاج الفني، وتعليقها على تعرض أعمالها لحملات هجوم وانتقادات.

كما تحدثت منى عن علاقتها بابنتها الكبرى "لي لي" وصعوبات دورها في الحياة كأمّ، وموقفها من عمليات التجميل وحقيقة خوفها من ظهور علامات السن على وجهها، وغيرها من الأمور الشخصية والفنية.

قالت منى: "قررت في فترة أتوقف عن الشغل لما بنتي كانت صغيرة ووالدي توفي، مكنتش عايزة أسيب بنتي ولا عايزة أحمد يروح الشغل، ولكن بعد شوية الموضوع اتحسن".

أما عن تعرض أعمالها الفنية لحملات وانتقادات، فعلقت قائلة: "حتى كلمة لجان مسخوها، أنا بحاول مقرأش وأكيد في وقت الحاجات دي بتضايق إحنا بني آدمين، ده فراغ وغضب رهيب عند الشخص وران شيء ما ومش عارف يفرغ الطاقة دي، وهو مستخبي ورا الشاشة والناس بقى عندها توحش غريب، حتى العمل السيّئ ممكن تتعاطفي معاه من كتر ما الناس متوحشة وقطعت فيه".

وتابعت منى زكي: "السوشيال ميديا مبتمثلش الناس في الشارع، واللي يفكر يعمل لجنة علشان يهاجم حد جواه كره، لو عايز تعلي نفسك حقك بفلوسك، ولكن أنت تصرف علشان ده فحاجة غريبة".

كما كشفت عن تفاصيل دخولها مجال الإنتاج الفني، موضحة أنها حاليًا لم تستمر بالمجال، وعلقت مازحة: "مرة فتحت شركة إنتاج واتداينت الحمد لله وبسدد ديوني من خمس سنين".

وعن إمكانية خضوعها لعملية تجميل، قالت منى زكي، إنها تعمل بالفترة الحالية على تقبل المرحلة العمرية والتغيرات التي طرأت عليها، كاشفة عن روتينها في العناية بالبشرة، قائلة: "كنت أنا وأصحابي من فترة وصلنا لقرار إننا هنحاول نتقبل السن ونتعايش، وبعد يومين قابلت زميلة أول حاجة قالتها لي إنتي محتاجة تعملي عملية شد بسرعة، قلت لها حرام عليكي بحاول أتقبل الوضع، طبعًا هي هزتني ولكني عايزة أفضل أحاول أتقبل السن والمرحلة".

وتابعت منى زكي: "كنت في فترة بحط كريمات ولكن حصلي إكزيما، ولكني بقيت أحط زيوت، ودلوقتي بحط ماية رز على وشي، وبعدين بحط زيت لبان الدكر مع زيت أفوكادو وبعمل مساج معين في وشي ويوجا".

كما تحدثت منى زكي، عن ابنتها لي لي أحمد حلمي، قائلة: "بنتي أكتر واحدة ربيتها الحمد لله، والواقع أنها أم لأخواتها، وواخدة مني تقبل الآخر بسهولة، والعملية وعايزة تشتغل من وهي صغيرة، وواخدة من أحمد خفة الدم، وهي اختارت كل حاجة في حياتها، ومن كتر ما أنا متضايقة أنها مسافرة كنت عصبية جدًا على كل الناس لغاية قبل ما أمشي بيوم من عندها انهارت من العياط وبقيت أقولها كلام كأني مش هشوفها تاني".

وصفت منى نفسها بأنها تتحول الى "أم تقليدية جدًّا" خلال الإجازات الصيفية، معلقة: "بحب وقت البحر بلعب طاولة وبعيش الجو العائلي بعيد عن الشغل، وبستمتع بالبساطة دي جدًّا".

وعن تحدياتها كأم، قالت: "أكتر حاجة متعبة إني بحس إن جزء مني بيروح مع ولادي وميرجعش، وبحاول أوازن بين كوني أم ومحافظتي عليهم.

وأكدت أن طريقتها في التربية تعتمد على الصرامة المعتدلة والمرونة، مضيفة: "أنا مش أم مدللة، بس عايزة ولادي يكون عندهم شخصية مستقلة ومسؤولة".

قد يهمك أيضــــــــــــــا

منى زكي وهند صبري أبرز النجمات العرب في صف محاربات سرطان الثدي

منى زكي تتألق بالأحمر والأسود في أمسية فخمة جمعت النجمات في دبي