تحمل صفحة على الـ"فيسبوك" اسم "الراقي الشرعي الشريف محمد البقالي"، أو "أبو هدهدة"، واللي خلقت جدلًا واسعًا بسبب المنشورات الغريبة اللي فيها، وتحديد أسعار كبيرة للخدمات اللي كيقدمها الراقي.

وقال المشرف على الصفحة، نقلًا عن موقع "كيفاش": "أنا ماشي راقي شرعي، وإنما درت هاد الصفحة للضحك فقط، والناس تّيقو القصة، الغريب أن بعض المواقع صدقات شنو كتبت وبداو كيحطو هاد الشي على أساس أنه حقيقي”.

وأضاف: “حنا جوج دراري الأول خريج معهد الوطني للعلوم التطبيقية، وأنا خريج جامعة العلوم فيزياء تخصص الأشعة، وفأول يوم كان عندي مشروع التخرج ودرتو على المفاعلات النووية، فاش ساليت العرض استغليت دوك المعدات اللي كانو وحطيت صورة في هاد الصفحة، وقلت باللي أنا شيخ اسكت وكالة ناسا، وأكدت أن الأرض مسطحة وليست كروية”.

وتابع المشرف على الصفحة: “ومن ديك الساعة والصفحة ديالي عرفات رواج كبير حيث كتبت أسعار الخدمات اللي كنقدم، حتى لقيت مجموعة من الناس مصدقة هاد الشي وشي وحدين بداو كيسولوني فين جا المركز، وكنت كنرد سير أخويا رقي راسك أنا ماشي راقي راه غير ضاحك”.

وختم صاحب الصفحة حديثه بالقول: “أنا كنفكر نسد هاد الصفحة لأنه فالأول كنت غير ضاحك، دابا الناس تيقوني وكاين اللي بدا كيهدد فيا فالخاص، فمن الأحسن نحيد هاد الشي لأن بصح ساركازم ما كيقبلوهش الناس عندنا”