مكرونة بالزيتون والباذنجان

وصفتنا النهارده صحية ومفيدة خصوصا للناس اللي بيعملوا ريجيم، جرّبي معانا المكرونة بالزيتون والباذنجان بطريقة سهلة وبسيطة. المقادير: ½ كيس مكرونة اسباجيتي ( أو أي نوع تحبّيه) ثمرة باذنجان مقطّعة مكعبات صغيرة ½ كوب زيتون أخضر مقطّع شرائح 2 ملعقة كبيرة زيت زيتون جبنة بارميزان (اختياري) ¼ كوب بقدونس مفروم فص ثوم مفروم عصير ليمونة فلفل أسود الطريقة: 1- اسلقي المكرونة، وبعدين سخّني زيت الزيتون على النار وشوّحي فيه الثوم، وبعد كده ضيفي عليه الباذنجان وقلّبيه لمدة 5 دقائق، وبعدين ضيفي عليه عصير الليمون والزيتون، وقلّبيهم على النار لحد ما يبقى لون  الباذنجان دهبي. 2- شيلي المكرونة من على النار وصفّيها من الميه، وبعدين ضيفيها للباذنجان، وقلّبيهم مع بعض على النار، وبعدين ضيفي عليها نصف كمية البقدونس واستمرّي بالتقليب لمدة من 7 إلى 10 دقائق. 3- شيلي المكرونة من على النار، وحطّيها في طبق التقديم وضيفي عليها الفلفل الأسود، ورشّي عليها الجبنة وباقي كمية البقدونس، وقدّميها.. وبالهنا والشفا.