نجلاء بدر تعلن تعافيها من فيروس كورونا

بعد ثلاثة أسابيع من المعاناة، أعلنت الفنانة نجلاء بدر تعافيها من فيروس كورونا، وظهرت المسحة الثالثة لها سلبية، وقدمت بثا مباشرا عبر صفحتها على موقع الفيس بوك، لرواية قصة المرض كاملة، ولن تحصل نجلاء على فترة نقاهة، حيث عادت بالفعل لتصوير مسلسل "بين السما والأرض"، ومن المقرر أن تستأنف تصوير مسلسل "نسل الأغراب".

وقالت نجلاء بدر، في الفيديو: يوم 22 فبراير أصيبت بفيروس كورونا، ربنا كان كريم معايا، والحمد لله عديت منها بأمن وسلام، وكنت في العزل في البيت مش في المستشفى، الفيروس مش سهل خالص.

وأضافت: من أكتر الناس والفنانات اللي وقفوا جنبي ودعموني نفسيًا، الفنانة نبيلة عبيد كلمتني أكتر من مرة وبعتت لي رسائل، قد إيه كانت رسايلها فيها حب واهتمام ودفا، اتفاجئت إن فيه ناس كنت مقصرة في حقهم، وكانوا معايا دائمًا زي أحمد السقا وزوجته مها الصغير.

وتابعت: معرفش إزاي أصبت بكورونا، مش عارفة أحصر إمتى وفين، بس هي قريبة جدًا، كنت خايفة وبعمل الإجراءات الاحترازية، والأعراض اللي جات لي كانت بداية من فقدان حاسة الشم والتذوق، مكنتش باخد أدوية كتير بس أخدت كورتيزون، والأعراض بدأت تزيد زي التكسير والحرارة وقلبان في البطن والمعدة وحاجات متغيرة، والأكسجين كان بينزل بيتراوح بين 91 و92، هو مش مفهوم له كتالوج ومرهق، وبعد المسحة وطلعت سلبي، سايب علامات.

واختتمت قائلة: أهم حاجة الاكتشاف المبكر، والسوائل والمياه والراحة التامة، ممكن تكون جت عند ناس خفيفة، وناس تقيلة أوي، الكورونا مش حاجة حلوة ولا لذيذة، هو داخل يتسلى عليك ونقطة الضعف اللي عند الشخص، كنت كتبت يا غالب يا مغلوب، بخلاف الطاقة الإيجابية، وتجربة صعبة أوي حقيقي وفيه ناس كانت بتبعتلي أكل علشان اتغذى، وناس عمري ما شوفتها ولا عرفتها، عرفت بقيمتي عند ناس كتير أوي، وعدت حساباتي في حاجات كتير أوي

قد يهمك ايضا

نجلاء بدر تُؤكّد أنّها استعانت بمَرَاجع تاريخية من أجل مسلسل "الفتوة"

نجلاء بدر تتصدر حديث الجمهور بسبب صورها مع أحمد صلاح