إلهام شاهين تُعلن غيابها عن دراما رمضان 2023

أعلنت الفنانة إلهام شاهين، انسحابها من المشاركة في موسم المسلسلات المصرية لرمضان 2023، بعد اعتذارها عن عدم المشاركة ببطولة مسلسل "حضرة العمدة" أمام النجمة روبي، وقالت إلهام إن شروط السوق حالياً لا تتوافق مع شروطها، لأنها تصر على قراءة سيناريو العمل كاملاً قبل التعاقد رسمياً.

أضافت إلهام شاهين خلال حوارها مع قناة DMC، على هامش حفل افتتاح مهرجان القاهرة السينمائي: أنا مش هكون موجودة في رمضان اللي جاي، لأني جبانة شوية وبحب يكون معايا كل حلقات المسلسل.

وتابعت: مبعرفش أدخل أصور وأنا معايا 8 أو حتى 10 حلقات من 30 حلقة، بحب أفرغ دوري وأبقى فاهمة أنا حجمي إيه في العمل من كل اللي حواليا، وأدرس العمل، وأنا متعبة شوية في شغلي وده بيتعب المنتجين مني مش قادرة أجاري السوق، ولكني كنت أتمنى أبقى موجودة.

وأكدت إلهام شاهين، سعادتها الكبيرة بتكريم المخرجة كاملة أبو ذكري، بجائزة فاتن حمامة للتميز، وقالت: تكريم حبيبة قلبي كاملة أبو ذكري، اللي قدمت معاها أحلى أعمالي على الإطلاق وآخر عمل في حياتي، مسلسل بطلوع الروح اللي كل يوم بياخد جائزة في بلد، وكاملة مخرجة مهمة جداً ومميزة جداً وأعمالها علامة في تاريخنا سواء سينمائياً أو درامياً.

وتابعت كاشفة كواليس عملها مع المخرج كاملة أبو ذكري، في فيلم واحد صفر: كاملة أبو ذكري، الوحيدة اللي كل مرة بتفاجئني، يعني بتفكر فيا في أدوار مفيش حد فكر فيا فيها من قبل ولا أنا قدمتها، يعني في فيلم واحد صفر قدمت المرأة المسيحية وقضية شائكة جداً وجالي جوابات شكر كتير من ستات مسيحيات شافوا إني بأدي دورهم في الحياة.

كما علقت على تكريم الفنانة لبلبة، بجائزة الهرم الذهبي لإنجاز العمر، بمهرجان القاهرة السينمائي، قائلة: لبلبة حبيبة قلبي وصداقة عمر وعشرة عمر طويلة وبموت فيها، إنسانة طيبة جميلة وصادقة وبتحب شغلها أوي وتستاهل كل تكريم.

وأشادت الفنانة إلهام شاهين، بجهود الفنان حسين فهمي، رئيس مهرجان القاهرة السينمائي، موضحة: اللي بيميز الدورة دي وجود الفنان العظيم حسين فهمي، وطبعاً وجوده عامل ثقل كبير للمهرجان كاسم نجم كبير، وعندنا السنة دي ضيوف أجانب كتير جداً وكمان المخرج بيلا تار هيكون فيه ندوة ليه بكره وماستر كلاس، وهيعرضوا فيلم ليه، وفي والسنة دي فيه ضيوف كتير مهمين وأفلام مهمة، يعني هنبقى محتارين نشوف إيه ولا إيه.

وأضافت: والفنان حسين فهمي وكل فريق العمل عاملين مجهود كبير جداً علشان المهرجان يظهر على أعلى مستوى، المهرجان حلو جداً كله إيجابيات ومفيش سلبيات، المهم إن الناس تتابع الأفلام وتستمتع بأفلام مميزة مش هيقدروا يشوفوها غير في المهرجانات.

قد يهمك أيضــــــــــــــــًا :

وفاء عامر بدلاً من إلهام شاهين مع "حضرة العمدة" روبي

إلهام شاهين سعيدة بتكريمها في المهرجان المصري الأميركي للسينما