حسن الرداد يردّ على مطلقي الشائعات عنه وزوجته ويعتبرهم "مأجورين"

كشف الفنان المصري حسن الرداد، عن رأيه في الشائعات التي تطارده وزوجته الفنانة إيمي سمير غانم، في الفترة الأخيرة، والتي وصلت إلى حد تردد أنباء عن انفصالهما.وقال الرداد على هامش العرض الخاص لفيلمه الجديد "توأم روحي": "مقدرش أقول الصحافة هي الي بتروج للشائعات، إنما الي بيعمل كده دول دخلاء على المهنة الشريفة والعظيمة دي"، وأضاف: "دول ناس مريضة، شخص عنده صفحة يكتب خبر ويقوم عامل كام حساب مزيف علشان يكتب تعليقات، ومن هنا تبدأ الشائعة في الانتشار، في منهم مأجورين ومنهم غاوي شهرة".

وتابع: "هو بينقي ناس محبوبة ومشهورة، لو كتب عن ناس مش ناجحين محدش هياخد باله من الي بيكتبه، بس أنا وإيمي الحمدلله الناس بتهتم بأخبارنا من ساعة ما اتجوزنا، فلما بيتكتب عننا حاجة الناس بتتفاعل معاها".وعن فيلمه الجديد "توأم روحي" قال: "فيلم مختلف تمامًا... متعود الفترة الأخيرة بعمل أفلام كوميدي، وفي الدراما بعمل أدوار جد، بس في السينما بقالي فترة بعمل أفلام كوميدية".وأكمل: "السينما غير التلفزيون، في التلفزيون إنتي بتروحي للناس من غير مجهود ولو عجبهم المسلسل بيتفرجوا.. لو معجبهمش خلاص..

إنما السينما الوضع مختلف خالص لازم يكون في عنصر جذب يشد الجمهور علشان يدخلوا الفيلم،والي أنا بعمله دلوقتي إني عاوز أكون متنوع والناس تجيلي علشان بقدم كل حاجة، كوميدي وأكشن ودراما ورومانسي".وعن رأيه في البطولة الجماعية، قال: "الأمر يتوقف على السيناريو والقصة المكتوبة، فكرة إني أعمل فيلم علشان أبقى بطل لوحدي ده شيء فاشل تمامًا، لازم يكون السيناريو يسمح والقصة تركيبتها مناسبة، وعمومًا كل ما يكون في شخصيات كتير وأدوار بطولة متعددة، كل ما الجمهور بيتشد أكتر للعمل".وبشأن تعاونه مع النجمتين عائشة بن أحمد وأمينة خليل في الفيلم،

قال: "الاتنين ممثلتين موهوبتين وشاطرين جدًا، الكواليس معاهم كانت هايلة،محترفين بجد وكلهم حافظين كويس ومذاكرين كويس وكان في تناغم كبير بينا".وعن علاقته بالإعلامي رامي رضوان زوج دنيا سمير غانم، شقيقة إيمي، قال: "رامي حبيبي وأخويا، من الناس المهذبة جدًا ومثقف جدًا ودايما بهزر معاه وأقوله يا عديلي".وعن أفلامه الجديدة، قال: "عندي فيلمين جداد، أولهم فيلم أكشن تمامًا، والتاني مفاجأة كبيرة مش هعلن عنها دلوقتي، بس هو فيلم كبير وضخم وهيتصور 90% منه برة مصر، وعندي مسلسل في رمضان اللي جاي إن شاء الله.

قد يهمك ايضا:

حسن الردّاد يكشف صعوبات "توأم روحي" مع منى الشاذلي

حسن الرداد يؤكّد أنه تعلم قيادة الدرّاجات البخارية رغم عقدته منها